93. De Compassione BMV.

1a. Salve, virgo gloriosa,
O regina caelitum,
Mater matrum dolorosa,
Audi preces supplicum.

1b. Salve tu, quae pertulisti
Dolorem acerrimum,
Cum circumcidi vidisti
Natum dilectissimum.

2 a. Salve, quae plena timore
Effugis cum filio,
Quae Nazareth cum pavore
Redis ab exsilio.

2 b. Salve, quae post tot dolores
Natum quaerens perditum
In templo inter doctores
Invenisti subditum.

3 a. Salve tu, quae dulcem natum
Sciens nummis proditum,
Sciens sputum, flagellatum,
Paene emittis spiritum.

3 b. Salve, sanguine stillantem
Quae dum natum reperis,
Crucem dorso baiulantem,
Exanimis laberis.

4 a. Cum crucifixum vidisti,
Tradita discipulo,
Mortis dolores sensisti
Confixa cum filio.

4 b. Dum filius moritur,

Vitae eclipsim pateris,
Antro cum sepelitur,
Cum nato includens.

5. Tot ergo passa dolores,
Virgo, martyr inclita,
Nostros releva labores
Et perduc ad sidera.