100. In Assumptione BMV.

1. Ad honorem matris piae
Vox erumpat symphoniae
Festi sonans gaudia.

2 a. Verbi parens, hortus nucum,
Commutat onus caducum
Immortali trabea.

2 b. Pubescenti par aurorae,
Rubens fructu, candens flore.
Vitae vernat laurea.

3 a. Olim moriens, nunc vivus
Iesus obviat festivus
Coronatae virgini,

3 b. Ut eam in dextra patris,
Quantum capit honor matris,
Suae reddat culmini.

4 a. Nati regis

incumbens dexterae
Vitae vias

excurrit prospere,
Novo suae

virtutis pondere

Transmetitur aethera.

4 b. Intrat aulam

fecundi luminis,
Sequens agnum

secundi tramitis
Sceptrum sumit
caelestis ordinis,
Nutu premit infera.

5 a. Spiritus, qui colunt caelos,
Choros iungunt, fundunt me-
los
Miri modulaminis

5 b. Offerentes arte nota
Iubilos et laudum vota,
Novum genus carminis.

6 a. Sistitur in caeli sede
Vivo terens caput pede
Serpentis tartarei,

6 b. Ut iam nec in subcalcari

Possit robur infirmari

Virginalis fidei.

7 a. Ergo tenet

lucem, quam edidit,
Quam et Eva

sub ficu perdidit,
Testam cuius
fregit et abdidit
Plebs Hebraea.

7 b. Sed celeri

Deus iuvamine
Integravit

a mortis fragmine
Testam carnis

sumptam a virgine
Nazaraea.

8 a. Rex potitus exquisitis
Amplexibus Sunamitis
Pio calet pectore

8 b. Et movetur circa reos
Per Mariam solvens eos
A peccati corpore.

9 a. Habet vim iudicii
Ore data filii
Bersabeae ratio,

9 b. Quod pro reis valeat
Nec effectu careat
Mariae petitio.

10 a. Post expressum crucis prelum
Manu forti virgo caelum
Prior cunctis rapuit,

10 b. Quae vovere sementiva,
Suae carnis incentiva,
Deo prima voluit.

11a. Sacrum vellus

carnis virgineae
Caelo datur,
adfertur areae,
Ut pia fert opinio,

11b. Nam teneri

morte non debuit,
Per quam nobis
a morte potuit

Procurari redemptio.

12 a. Regnat una

post natum unicum,
Terras tenet

orbemque caelicum
Novae potestatis mole,

12 b. Et est dignum

dictatque ratio,
Ut subdatur
[eius] obsequio,
Quidquid spirat sub hoc
sole.

13 a. Iam praelata

caeli militiae
Imperatrix

et datrix gloriae,
Suspirantes

ad donum veniae
Donativis

exornet gratiae
Mater pia.

13 b. Quibus adime

fides est tenera,
Pietatis

impendat viscera
Et ad regnum,

quod spondet litera,
Nos perducat
virgo puerpera
Precum via.