103. De beata Maria V.
In Octava Domini.

1 a. Fons hortorum, fons signatus,
Hortus clausus sed rigatus
Aqua sapientiae,

1 b. Rosa prima, rosa vernans,
Virga Iesse, virga praegnans,
Virgo stirpis regiae,

2 a. Flammans rubos sed non ustus,
Quo deletur dolens gustus
Pomi quondam vetiti,

2 b. Turris David, thronus regis,
Cedrus alta, frenum legis
Singularis meriti,

3 a. Clausa semper templi porta,
Per quam tamen lux est orta,
Lux eclipsis nescia,

3 b. Poli sidus, stella maris
Tu es, virgo singularis,
Novi solis regia.

4 a. Tu flos florum, floris mater,
Cuius natus est, qui pater
Ex natura gemina;

4 b. Tu nam lactas, quem adoras,
Sinu foves, quem imploras,
Grata Deo femina.

5 a. Digna ergo Dei parens
Vitiorum spinis carens,
Inter spinas lilium,

5 b. Nos ingratos, nos indignos
Gratos recide facque dignos,
Tuam placa filium.

6 a. Sed hanc tuam civitatem
Serva, virgo, tempestatem
Ab hac omnem adime,

6 b. Absit languor, absit error,
Absit hostis, absit terror,
Terrae motus maxime.

7 a. Clerum quoque, plebem totam,
Tibi fidam ac devotam,
Solito custodias

7 b. Et post huius vitae cursum
Ad perennem vitam sursum
Pervenire facias.