920 Acta Apostolicæ Sedis - Commentarium Officiale

CONGREGATIO PRO EPISCOPIS

MONTIS CASSINI et SORANÆ-AQUINATENSIS-PONTISCURVI

De abbatiae territorialis Montis Cassini fìnium mutatione atque dioecesis Sora-

nae-Aquinatensis-Pontiscurvi nominis mutatione.

DECRETUM

Ad Cassinum Montem cum beatus Benedictus abbas advenisset, eversis

idolis eorumque cultu, atque domo veri Dei constituta quae clarissima futura

erat in orbe terrarum, etiam « commorantem circumquaque multitudinem

praedicatione continua ad fidem » vocavit (Gregorius Magnus, Dial. II, 8).

Auctoritate vero qua ipse vivens pollebat, ope insuper discipulorum eius qui,

deficiente episcopatu Cassinensi ob barbaricas vastationes, ecclesias, domos

et pagos ipsos decursu temporum condiderunt, necnon accedentibus pietate

fidelium et principum novis semper finibus, factum est ut late cresceret

ea quae iure dicta est « Terra Sancti Benedicti » loco antiquae dioeceseos.

Hinc etiam Abbates Cassinenses, ipsius Patriarchae successores, ita quo-

que publicis et ecclesiasticis rebus exigentibus, ac pluribus deinde superve-

nientibus Summorum Pontificum concessionibus, praerogativis et privilegiis,

ut in regimine monasterii, ita etiam in totius illius « Terrae » iurisdictione

successerunt, quae ordinaria et quasi plenarie episcopalis facta est.

Monachi cassinenses, suo ministerio pro animarum salute laudabiliter

semper expleto, Ecclesiae ac fidelium gratiarumque actionem mereunt.

Attentis, tamen, peculiaribus huius temporis adiunctis, ad hanc vene-

rabilem monasticam institutionem proprio in suo spiritu tuendam atque ut

monachi, quacumque alia sollicitudine ablata, ad intimam cum Deo unionem

augendam et ad divinam laudem persolvendam se integre dicare possint,

Summus Pontifex Franciscus, Divina Providentia PP., iis prae oculis habitis

quae Motu proprio « Catholica Ecclesia De Abbatiarum Nullius Dioeceseos

innovatione », die XXiii Octobris anno mcmlXXvi edito, decreta sunt, memo-

ratae Abbatiae territorium noviter definiendum statuit.