108. De beata Maria V.

1. Almiflua

caelorum turba

2 a. Individuae
trinitati
laudes concinit in astris.

2 b. Nos quoque in arvis
gratulantes
ipsius mysteria

3 a. Nisibus ex totis
per longa recitemus
devote tempora.

3 b. Exsultent cernendo
regis obtutum celsi
sanctorum agmina.

4 a. Iubilet et in huius
diei festa
populorum caterva

4 b. Poplite flexo Christi
solamen poscens,
paradisi gaudia,

5 a. Ut queant iter post
carnis mortem vitae
scandere superna,

5 b. Qua Dei genetrix
cum civibus almis
consistit Maria.

6 a. Quae meruit in tantum
conditoris aeterni
fore conspectibus
placita,

6 b. Ut humani generis
factorem generarent
casta sui corporis
viscera.

7 a. O virgo clausa per
aevum, per te cunctis
est patefacta
altithroni ianua.

7 b. Qua propter veniam
servulis, quaesumus,
[efflagitare]
prece [tua] sedula,

8. Qua perfrui tecum
mereamur gloria
per eum, qui regnat
in cuncta saecula.