109. De beata Maria V.

1 a. Ave, dulcis mater Dei,
Christi thronus requiei,
Maria templum gratiae;

1 b. Ave, advocata rei,
Digna cantu iubilaei,
Grata in prolis facie.

2 a. Ave, porta non aperta,
Dei numine referta
Sine viri collegio ;

2 b. Ave, culpae inexperta,
Sola digna es reperta,
Tibi plaudit omnis regio.

3 a. Ave, mater sanctitatis,
Palma fulgens bonitatis
Prae singulis cum gloria;

3 b. Ave salus tribulatis,

Spes oppressis in peccatis,
Reis salus, memoria.

4. Ave, vera maris stella,
Praeelecta Dei cella,
Benedicta tu puerpera.