111. De beata Maria V.

1 a. Ave, luna, quam fundavit
Sol, qui mundum visitavit
Apparens hominibus,

1 b. Cum est nostri recordatus,
Paulo minus minoratus
A supernis civibus.

2 a. Tu es sponsa, de qua sponsus,
Tamquam nube ait absconsus,
Deus noster prodiit,

2 b. Qui de summis est egressus
Et ad summum est regressus,
Cum ad patrem rediit.

3 a. O Maria, mater Christi,
Deum ex te genuisti
Sine carnis macula,

3 b. Qui rex potens, Deus fortis,
Expugnavit hostem mortis
Nostra solvens vincula.

4 a. Ave, parens o beata,
Quae in veste deaurata
Nites ante Dominum,

4 b. Praeis omnes cum corona,

Te sequuntur fronte prona

Omnes coetus virginum.

5 a. Dulciter quae redoles
Miseris et condoles,
Preces Deo immoles
Pro nobis, ut assoles,
O vas deitatis.

5 b. Vallis vernans liliis,
Quae vacas deliciis,
Nostris nunc miseriis
Assis tu suffragiis,
O fons pietatis.