113. De beata Maria V.

1 a. Ave, mater gratiae,
Speculum ecclesiae,
Luminare gentium.

1 b. Ave, virgo regia,
Dei plena gratia,
Virginale lilium.

2 a. Templum sancti spiritus,
Obumbratum caelitus,
Portus post naufragium,

2 b. Stella maris lucida,
Virga Iesse florida,
Dei gignens filium.

3 a. Gaude, iubar saeculi,
Christiani populi

Spes atque refugium,

3 b. Sis norma credentibus,
Spes, via petentibus
Caeleste palatium.

4 a. Virgo, porta gloriae,
Fons misericordiae,
Salus infirmantium,

4 b. Delinquentes erige,
Paenitentes dirige
Ad optatum bravium.

5 a. Mundi mater, domina,
Ne nos perdant crimina,
Tuum fer auxilium,

5 b. De valle miseriae
Nos manu clementiae
Duc ad verum gaudium.