117. De beata Maria V.

1a. Ave, nympha salutaris,
Summi patris natum paris,
Virgo pura, singularis,
Fons dulcoris, stella maris.

1b. Ave, verae vitae datrix
Et a nece liberatrix,
Angelorum imperatrix
Ac caelorum dominatrix.

2 a. O Maria, mater facta,
Non a viro tamen tacta,
Virgo parens, sed intacta,
Miro modo mater facta.

2 b. Orbis gemma, orbis vita,
In corona regis sita,
Pietate expolita,
Caritate insignita.

3 a. Salve, virgo, parens Christi,
Nos a luctu serva tristi,
Des solamen choro isti,
Dulcis mater Iesu Christi.

3 b. Salve, salus infirmorum,
Medicina languidorum,
Verum lumen es caecorum
Et adiutrix peccatorum.

4 a. O virtutis disciplina,
Dos salutis, lux divina,
Nos exaudi, flos de spina,
Deprecamur voce trina.

4 b. O lux, nostras faeces cura,
Mater virgo non natura,
Nos a nece serva dura
Post ruinam, virgo pura.