119. De beata Maria V.

1a. Ave, porta gratiae,
Portus pudicitiae,
Sponsa salvatoris,

1b. Aula sapientiae,

Thalamus clementiae,
Sedes redemptoris.

2 a. Fons signatus, es rigatus
Rore spiritali,
Fons sacratus, fons dotatus
Partu virginali.

2 b. Tu sigillum trinitatis,
Iacob scala rutilans,
Vexillum humilitatis,
Daemones emutilans.

3 a. Vestis Ioseph, quam ornavit
Deus sacro flamine,
Quam pro nobis madidavit
Christus suo sanguine.

3 b. O peccator in profundo
Vitiorum positus,
Hanc honora corde mundo,
Templum sancti spiritus.

4 a. O Maria, virga Iesse,
Quae reis nescis abesse
Petentibus veniam,

4 b. Fac nos peccatis deesse,
Ostende te matrem esse
Conferendo gratiam.

5. Virgo mater, o Maria,

Plausu bino te laudamus,
Ut ad caelos ascendamus
Per tua suffragia.