121. De beata Maria V.

1a. Ave, salve, condimentum
Permutantis in pigmentum
Nostrae mortis situlam,

1 b. Haec sunt dona potestatis,
Non naturae, immo gratis
Verbi sumpsit copulam.

2 a. Regem regum parientis
Laudes promat concinentis
Chori iubilatio,

2 b. Patrem natae proferentis
Sit cum cantu purae mentis
Plena modulatio.

3 a. Laude tanta cum perpendis,
Caro carens carnis mendis
Verbi facta socia,

3 b. Sola Christi partu digna
Veneretur tam benigna
Virgo viri nescia.

4 a. Virgo manens sola matrum,
Ora patrem, iube natum
Servos matris visere,

4 b. Ut te duce, stella dicta,
Nos vagantes per delicta
Tuo trahat littore.