122. De beata Maria V.

1a. Ave, stella fulgida,

stella salutaris,
Stella, de qua prodiit

radius solaris,
Mentis pelle tenebras

nec nos patiaris
Absorberi fluctibus

procellosi maris.

1 b. Ave, mater gratiae,

gemmis redimita,
Mater, per quam pauperum

vox est exaudita,
Tuus nobis filius

in praesenti vita
Via sit et veritas

in futura vita.

2 a, Ave, Dei thalamus,

pudoris conclave,
Missus est archangelus

cui dicens "Ave",
Te laudantes petimus,

erue nos a vae,
Quod induxit facinus

protoplasti grave.

2 b. Ave, naufragantibus

lucens stella maris,
Quae per mundi climata

Maria vocaris,
Esto tuis famulis

portus salutaris
Et lapsos in crimine

reduc sacris aris.

3. Ave, gemma virginum,

gratiae piscina,
Tibi grates solvimus,

aurem huc inclina
Et, quos hostis adgravat,

premit culpae spina,
Redde gratos et a fraude

muni serpentina.