123. De beata Maria V.

1 a. Ave, virgo laude digna,
Ave, pia et benigna,
Ave, plena gratia,

1 b. Ave, mater pietatis,
Fax et gemma caritatis,
Virgo, Sion filia.

2 a. Porta caeli, maris stella,
Mundi salus, Dei cella,
Templum sancti spiritus,

2 b. Hortum tuum qui rigavit
Et rigando germinavit
Fructum vitae caelitus.

3 a. In te Deum humanari,
Nube carnis occultari
Firma docet litera,

3 b. Fecundata virga flore,
Stella sole, vellus rore,
Virgo Dei filio.

4 a. Unitur carni deitas,
Deum parit integritas
Conspirante flamine,

4 b. Divina sapientia

Sic patris providentia
Nascitur ex virgine.

5 a. Ramus florens et onustus,
Rubus ardens nec combustus
Matrem signat virginem,

5 b, Quae intacta concepisti,
Virgo manens peperisti
Deum atque hominem.

6 a. Ima summis foederavit
Stella Iacob, radix David,
Mediante gratia,

6 b, Per quam reis salus datur,
Homo lapsus sublimatur
In caelesti gloria.

7 a. Ergo, mundi spes, Maria,
Pro indignis, mater pia,
Interpella filium:

7 b. Amor patris, spirans flamen,
In hac valle sis solamen
Et perenne gaudium.