124. De beata Maria V.

1 a. Ave, virgo, parens munda,
Maris expers et fecunda,
Nulli compar aut secunda
Partu castimoniae.

1b. Vitiorum necnon munda
Et virtute nos fecunda,
Votis nostris sis secunda
Zelo matris, filiae.

2 a. Electorum nulli par es,
Nam, dum verbo sacro pares,
Cunctas tibi sexu pares
Supplantas concipiens.

2 b. Maris stella, cuius ortus
Mare sedat, florens hortus,
Unde florum flos est ortus,
Viris vitam pariens.

3 a. Ave morum fons insignis,
Fonte vitae nos insignis,
Quem sub typo, quem in signis
Signat legis litera.

3 b. Rubi signum, iubar soli,
Lux praecellens luce soli,
Digna sola Deo soli
Dare matris ubera.

4 a. Iesse virga, verbi sedes
Incarnati, natum sedes
Tuum nobis, cum quo sedes
In excelsis gloriae.

4 b. Ave, clemens, mitis, ave,
Tuum nobis illud Ave
Munitivum fiat a Vae,
Collativum gratiae.