130. De beata Maria V.

1 a. Christi matrem collaudemus

Et in bonis abundemus

Terga dantes vitiis,

1 b. Ovans ovet omnis mundus,
Nam mundatur vir immundus
Eius beneficiis.

2 a. Haec suavis et benigna
Invenitur sola digna
Protulisse filium,

2b. Qui peccata mundi tollit,
Altos premit et extollit
Cathedras humilium.

3 a. Haec est portus nostrae spei,
Nostra salus atque Dei
Genetrix ac filia,

3 b. Mundi lumen, stella maris,
Rosa rubens singularis,
Fragrans super lilia.

4 a. Architecto caeli nupta,
Virgo manens incorrupta
Mundo Christum protulit,

4b. Hinc dolores, planctus, luctus
Abolevit atque fructus
Nobis vitae contulit.

5 a. O res munda mundum mundans,
Cum in promptu sit redundans
Sicca prius area,

5 b. Ut ros vellus madidavit,
Sic puellam gravidavit
Granum sine palea.

6 a. Ergo salve, sancta parens,
Bonis plena, malis carens
Et dolore vacua,

6 b. Inimici pelle fraudes,
Persolventes tibi laudes
Sordibus evacua.

Vale, arca testamenti,
Novum sidus firmamenti,

Ceteris splendidius,
Tu es botrus dignus flore,
Vellus madens, plenum rore,

Lilio candidius.