131. De beata Maria V.

1 a. De Maria, matre pia,

Per quam solam vitae via
Datur ad caelestia,

1b. Dulce melos depromamus,
Ut ipsius sentiamus
Optata suffragia.

2 a. Haec est vere pulchra tota,
Sine labe, sine nota,
Sola plena gratia,

2 b. Sola soli patri grata,

Est prae cunctis honorata
Casti partus gloria.

3 a. O miranda genitura !

Patrem virgo permansura
Patris parit filia;

3 b. Mater parit natum patris,
Pater gignit patrem matris
Miranda potentia.

4 a. Ave, virgo, mater Dei,
Ad te clamant omnes rei,
Placa patrem, filia.

4b. Ave, virgo, spes salutis,
Confer opem [constitutis]
Nobis in miseria.

5 a. Tu pudica, casta, munda,
Impudicos nos emunda,
Lava, terge vitia

5 b. Et cum clero plebem totam
Tuam et tibi devotam
Duc ad vitae gaudia.