134. De beata Maria V.

1 a. Flore novo fit odorus,
Novo partu fulgens thorus
Virginis puerperae,

1 b. Novam matrem flos fecundat,
Sed pudoris flos redundat
Novo legis foedere.

2 a. Virgo parit et miratur,
Quod tam mira comitatur
Pudorem fecunditas,

2 b. Caelum stupet et laetatur,
Quod sic nostrae reparatur
Unionis dignitas.

3 a. Dignam huius, dignam floris
Sensit Adam vim odoris
Positus exsilio,

3 b. Cum per crucis hic soporem
Pomi gustum et saporem
Mundat stillicidio,

4 a. Hoc de flore quod manavit,
Cuius gustus gustum lavit
Deglutitum temere.

4 b. Felix floris haec punctura,
Qua caeli, terrae iunctura
Fit per crucem propere.

5 a. Virga sicca istum dedit,
Quae florere nunquam cedit,
Dum floret in filio,

5 b. Ager plenus, quo virescit

Et in sanctis enitescit

Rosa, spica, lilio.

6 a. Hac erumpens virga granum
Caeli panem orbi sanum
Dat sumendum hodie,

6 b. Ut sic grano couniti
Vita simus et muniti
Iuste, pie, sobrie.