137. De beata Maria V.

1 a. Gaude, plebs catholica,
Laudes dans et cantica
Matri regis gloriae,

1 b. Vere digna laudibus,
Per quam fluxit gentibus
Oleum laetitiae.

2 a. Primae matris vitium
Traxit in exsilium
Nos et in miseriam,

2 b. Sed nos ab exsilio
Virgo felix filio

Reduxit in patriam.

3 a. Pater misit nuntiam
Et concepit filium
Virgo viri nescia.

3 b. Mater in visceribus
Novem tulit mensibus
Regem, qui fert omnia.

4 a. Mundo Christum edidit
Nec pudorem perdidit
Virgo, decus virginum,

4 b. Stella solem genuit,
Nata patrem protulit
Et ancilla dominum.

5 a. Virgo, salus hominum,
Per te nobis criminum
Largiatur venia,

5 b. Per te dentur gentibus
Tibi servientibus
Sempiterna gaudia.