138. De Beata Maria V.

1 a. Gaude, Sion mater, gaude,
Corde, voce, manu plaude,
In reginae caeli laude
Attollens praeconium.

1 b. Die ista domus Dei
Pari voce psallat ei,
Per quem flentes, per quem rei
Nacti sunt remedium.

2 a. Prima parens paradisum
Clausit, nobis trusit visum,
Facti sumus in derisum
In conspectu hostium.

2 b. Miser Adam, primus homo,
Est expulsus Dei domo,
Subit poenam, perdit pomo
Patriam vitalium.

3 a. Per hunc fructum Evae fructus

Ex natura fit corruptus,

Unde dolor, unde luctus

Finibus terrestrium.

3 b. Hoc de fructu condolentes
Obstupescunt nostri dentes,
Paradiso pulsi Hentes
Subimus exsilium.

4 a. Nobis diu exsulatis
Dolet pater pietatis
Et misertus desolatis
Suum misit filium.

4 b. Inclinavit maiestatem
Nostram ad utilitatem,
In ancillae castitatem
Assumens hospitium.

5 a. Hospitata Dei prole
Stella maris mixta sole,
Gravidatur sine mole
Virginale gremium,

5 b. Quo procedit specialis
Fructusque medicinalis,
Aufert morbos, confert malis,
Perimit daemonium.

6 a. Sit hic fructus benedictus,
Cedit hostis, ruit victus,
Homo lapsus stat ascriptus
In libro viventium.

6 b. Benedicta radix Iesse,
Nos vitali replens messe,
Quae dat suos salvos esse
Suum per obsequium.

7 a. Virgo mater, o Maria,
Virgo clemens, virgo pia,
Per quam patet nobis via
Ad caeli palatium.

7 b. Pietatem imploramus,
Proclamantes te rogamus,
Confer nobis, quod optamus,
Filium propitium.