140. De Beata Maria V.

1 a. Gaude, stella parens solis,
Gaude, virgo fructu prolis
Fecundata caelitus,

1 b. Rosa vernans, stirps electa,
Deum ferens et humecta
Rore sancti spiritus.

2 a. Notus Deus in Iudaea,
Homo natus est in ea
Spes communis omnium,

2 b. Vervex ille nobis datur,
Qui pro Isaac mactatur
Dulce sacrificium.

3 a. Sine succo, sine rore

Viret virga, dans cum flore
Novae fructum gratiae,

3 b. Dulcem nucem, veram lucem
Pium regem, rectum ducem
Ad quietem patriae.

4 a. Fracta fuit legis vena,
Iam aperta, iam serena
Signa fiunt vetera,

4 b. Noctem fugat lux amoena,
Per lucernam in lagena
Ionae marcet hedera.

5 a. Iam aufertur sceptrum Iuda,
Synagoga iacet nuda
Scisso legis tegmine.

5 b. Tange liram, sona laudes
Tu, qui Christum natum gaudes
Ex Maria virgine.

6 a. Umbra sumus, faex et fimus,
Pressi malis iam perimus,
O Maria, nisi simus
Tuis tuti precibus.

6 b. Mater vera regis veri,
Potes, si vis, nos tueri,
Praesta, nobis promereri
Locum in caelestibus.