142. De beata Maria V.

1. Gaude, virgo dulcissima,

Dei filii parens sanctissima,

Semper manens pudica.

2 a. Haec enim gloria

soli Mariae

est congrua,

2 b. Ut virgo permanens

Dei mater sit

et filia.

3 a. O laudanda fecunditas,

Quam sic amat virginitas,

Ut in te, mater et virgo,

Se osculentur mutuo

In osculo perpetuo.

3 b. Ab angelo salutata

Concepisti natum nata,

Ventris portasti thalamo,

Lactis potasti balsamo

Eius fruens eloquio.

4 a. Gaude, quae unicum

Tuum praedulcem filium

Frequentasti amplexibus

Amorem redolentibus.

4 b. Gaude, quae puero

In virginali gremio

Dulcem infigens oculum

Suave dedisti osculum.

5 a. Gaude, felici gaudio

Eodem gaudens filio,

Quem Deus, auctor omnium

Gaudet habere filium ;

O dulce consortium !

5b. Gaude, gaude plus quam

multum,

Quae dilecti vides vultum

In singulari gloria

Perennique concordia

In caelesti patria.

6 a. Gaude, virgo amabilis,

Tota desiderabilis,

Rosa rosarum omnium

Et liliorum lilium

Vitisque odorifera

Dei plantata dextera,

Finis amaritudinis,

Principium dulcedinis,

6 b. Te angeli glorificant,

Te omnes sancti praedicant,

Te humiles, te virgines,

Te laudant omnes homines,

Te benedicunt aethera,

Te sol, luna et sidera,

Te aer, tellus, maria,

Te ignis, nix, ros, pluvia.

7 a. In omnem terram Mariae

virtus exivit,

7 b. Et in fines orbis terrae

laus emicuit.

8 a. Haec speciosa regio

Fulget in caeli solio

Veluti sol in nubilo,

8 b. Per quam lux mundo claruit,

Umbra mortis evanuit,

Diesque laeta prodiit.

9 a. Suavis et delicata

Virgo, Deo grata,

Sis nobis lux praevia

Ad gaudia,

9 b. Ut veri solis specie

Fruamur in die

Videndo lumen semper

In lumine.

10 a. Per te panis caeli

Vero Israeli

Datur ; nos huius panis

Pinguedine

Reple, fons gratiae.

10 b. Tu es virga vivam

Nucem parturiens,

Urna decens aurea,

Verum manna

In te suscipiens.

11 a. Virgo mitis,

Iesum pro nobis ora,

Ut patientiae

Fructus ferre

Possimus regi gloriae.

11b. Iesu dulcis,

Visita corda nostra,

Ut caritas ardens

Et iugiter

Lucens in nobis fulgeat.

12 a. Pacis prospera,

Unitatis foedera,

Spiritus modestiam,

Puram conscientiam,

Veram sapientiam

Atque fidei constantiam,

12 b. Da spei gaudia,

Honestatis opera,

Amoris suspiria

Sanctitatis munera,

Ut in te unum simus,

Sicut cum patre tu es unus.

13. Miserere

Nobis, fili Mariae,

Rex aeterne.