143. De beata Maria V.

1. Laudes Christo decantemus,
Matris eius qui gaudemus
Speciali gloria.

2 a. Dulce melos tangat caelos,
Nam benignam, dulci dignam
Canimus melodia.

2 b. Voci vita conformetur,
Ut sincere celebretur
Mariae memoria.

3 a. Salvatoris matrem laudent,
Qui per eam sibi gaudent
Vitae dari munera

3 b. Dicantomnes et dicant singuli:

Ave, salus totius populi,

Virgo et puerpera.

4 a. O quam felix, quam praeclara
Mater virgo, Deo cara,
Sacro plena flamine,

4 b. Agno sine macula
Lactis dedit pocula
Sub carnis velamine.

5 a. Haec est scala peccatorum,
Per quam Christus, rex cae-
lorum,
Descendit ad infima,

5 b. Forma cuius singularis,
Per quam roris salutaris
Dona dantur intima.

6 a. Non sunt nova sacramenta
Nec de novo lex inventa,
Quae Mariam praedicat,

6 b. Aquas olim petra iecit,
Aquas Christus vinum fecit,
Dum Maria supplicat.

7 a. In scripturis sub figuris
Ista latent, sed iam patent,
Quod sit plena gratia.

7 b. Hostes cedunt, reges credunt,
Signa signis dum succedunt
Pro Mariae gloria.

8 a. Ista suos fortiores

Semper facit et victores.
Morbos sanat et languores,
Reprimit daemonia.

8 b. Dat captivis ubertatem
Vitae confert sanitatem
Ad antiquam dignitatem
Haec reduxit omnia.

9 a. Mundo signum triumphale,
Virgo mater, semper vale,
Quod in nobis est letale,
Serva tuo germine.

9 b. Medicina christiana,

Salva sanos, aegros sana,
Quod non valet vis humana,
Fit in tuo nomine.

10 a. Assistentes matris laudi,
Iesu pie, nos exaudi
Atque servos tuae matris
Post hanc vitam Dei patris
Transfer ad palatia

10 b. Et, quos matri vis servire,

Fac amara non sentire,

Sed, cum erit dies irae,

Nobis confer et largire

Sempiterna gaudia.