146. De beata Maria V.

1 a. Nato psallat virginis,
De qua salus hominis
Orta est et gloria,

1 b. Artes hostis cupidus
Debellare saepius
Cum summa victoria.

2 a. Matri Iesu singuli
Iubilemus cernui,
Nam solatur omnia.

2 b. Rosa tu praefulgida,
Salve, gemma candida,
Meritis eximia.

3 a. Aegris opem tristibus
Daque culpas flentibus
Compromissa gaudia,
Tu forma egregia,
Mater es et filia

3 b. Regum stirpe genita,
Nos benigne visita,
O beata femina,
Angelorum domina,
Per quam cuncta crimina
Lavit Christi gratia.

4 a. Benedic benedicentes
Te, ut sint praeeligentes
Iesum super omnia:

4 b. Sana, mater salvatoris,
Hydria caelestis roris,
Quod mens timet conscia.

5 a. Virgo pia, o Maria,
Stella maris appellaris
Operum per merita,

5 b. Turris, hortus, vitis, portus,
Ignis fulgens et tus ardens,
Nos torquentes excita.

6 a. Reis facta mediatrix,
Criminum es tu fugatrix,
Laetitiae primordia
Per te cepit ecclesia.

6 b. Euge, fluens tons aquarum,
Aquaeductus gratiarum,
Plena misericordia,
Mundum reples laetitia.

7 a. Benedicta vitae vena,
Audi vota laude plena,
Apud Christum chorum istum
Clementer concilia,

7 b. Flumen summae pietatis,
Servos suos atque tuos,
Cunctis data venia
Amen dicant omnia.