147. De beata Maria V.

1 a. O beata fecundata
Mater viri nescia,

1b. O devote salutata

Virgo plena gratia.

2 a. Dignam dignis stipent hymnis
Et extollant laudibus,

2 b. Qui salvari ac iuvari

Volunt eius precibus.

3 a. Fide, voto, corde toto
Veneremur pariter

3 b. Hanc felicem genetricem
Domini sollemniter,

4 a. Fatigati, castigati,

Sustinentes plurima,

4 b. Infirmati, perturbati

Temptationum genera,

5 a. Ut hic torti nec distorti
Carnis flentes vitia
Mereamur angelorum
Optata consortia.

5 b. Per contemptum quoquemundi
Consequamur dulcia,
Ut electi et dilecti
Beatorum praemia.

6 a. Eia, mater praeelecta,

Regnans in caelestibus

6 b. Apud Christum vota nostra
Promovere precibus,

7 a. Ut post huius finem vitae
Laeti pro victoria

7 b. In perenni mereamur
Te laudare gloria.