150. De beata Maria V.

1 a. Plebs fidelis iucundetur
Et Mariam veneretur,
Cuius digne celebretur
Celebris memoria.

1 b. Matrem Christi collaudemus,
Laudem dantes exsultemus,
Iubilantes imploremus
Eius patrocinia.

2 a. Mors per Evam subintravit,
Sed Maria mortem stravit
Et deletam reparavit
Salutem fidelibus.

2 b. Sui ventris dulcis fructus

Maris huius sedat luctus,

Abest dolor, abest luctus

Hoc fructu gustantibus.

3 a. Radix Iesse germinavit,
Virgo Deum generavit,
Non vir eam defloravit,
Cum prolem protulerit.

3 b. Fecundata sacro rore
Genetrix fit novo more.
Sine luctu et labore
Nata patrem peperit.

4 a. Vitrum sole penetratur
Et illaesum observatur,
Sic nec virgo violatur
Genetrix ex filio.

4 b. Obstupescit vas naturae
De confracto suo iure,
Factor omnis creaturae
Matris iacet gremio.

5 a. Arens virga profert florem,
Stella novum gignit solem,
Virgo mater parit prolem
Plena Dei gratia.

5 b. Haec est illa Dei cella,
Quae nos servet a procella,
Haec est clara Iacob stella,
Sed eclipsis nescia.

6 a. Virgo mater primae matris
Culpam lavit, nos ab atris
Claustris perhancsummi patris
Exemit clementia.

6 b. Terra caelo foederatur,
Vetus Adam detestatur,
Qui per novum sublimatur
In caelesti patria,

7 a. Casta mater salvatoris,
Spes reorum, vas pudoris,
Interesse caeli choris
Fac nos prece sedula.

7 b. Mundi salus, vitae via,
Nostri memor sis, Maria,
Nos ad caeli, mater pia,
Perduc habitacula.