153. De beata Maria V.

1 a. Salve, David stirps divina.
Christi mater et regina
Caelorum et hominum,

1b. Salve signis praesignata,
Aaron virga nominata,
Parens lucis luminum.

2 a. Salve, stella, mater solis,
Tu fiscella Dei prolis,
Testamenti tabula,

2 b. Salve, vellus Gedeonis,

Madens tellus septem donis,
Manna caeli situla.

3 a. Salve, rosa, lilium,
Campi flos, quae filium
Dei das visibilem,

3 b. Salve, quae sacrarium
Es virtutum omnium,
Gignens ineffabilem.

4 a. Salve, botrus cuius notus
In Iudaea balsamus,

4 b. Salve, mitis Cypri vitis,
Aromati calamus.

5 a. Salve, ferax et novella,
Quae oliva diceris,

5 b. Salve, petra fundens mella
In curam pestiferis.

6 a. Salve, noctis lux, columna,
Ducens caecos ex aerumna
Et inferni turbine,

6 b. Salve, nubes, quae funestum

Vitiorum vincis aestum

Tuo sancto nomine.

7. Salve, per te ut salvemur
Et in caelo collocemur
Merito

Tuoque iuvamine.