155. De beata Maria V.

1 a. Salve, mater gloriosa,
Virgo casta, speciosa,
Huius mundi tu lucerna,
Per quam claritas superna
Venit de caelestibus.

1 b. Stilla roris, flos odoris,
Fons dulcoris, vas decoris,
Sancta et immaculata,
Bona cuncta [per te data]
Profluunt fidelibus.

2 a. Per te mors interiit,
Per te vita rediit
Ex mundi miseria.

2 b. Foedos multo crimine
Munda tuo munere
Ducens ad caelestia.

3 a. Nobis praestetur venia
Per te simul et gratia,
Adesto iam viventibus
Unaque morientibus.

3 b. Ad nos, o pia, respice,
Precata nostra suscipe,
Peccataque praeterita
Nobis remitti flagita.