156. De beata Maria V.

1 a. Salve, mater, mater patris,
Soror sponsi, sponsa fratris,
Regis regum regia,

1 b. Haec est rubus inflammatus,
Quem non calcat calciatus
Sacra reverentia.

2 a. Sicca prius praeter morem
Virga frondens profert florem
Nucemque cum nucleo;

2 b. Incompluta manet tellus,
Dum complutum madet vellus
Gedeonis horreo.

3 a. Res miranda, virgo prolem,
Palmes vitem, stella solem,
Homo Deum baiulat,

3 b. Prodit sponsus nova sorte,
Nunc intactae claustrum portae
Prodiens diffibulat.

4 a. Ave, plena gratia,
Cella pigmentaria,
Cinnamomi calamus,

4 b. Mundi sanctuarium,
Caeli promptuarium,
Trinitatis thalamus.

5 a. Tu trium triclinium,
Trium domicilium,
Trium tabernaculum,

5 b. Patris consistorium,
Filii palatium,

Spiritus cenaculum.

6 a. Audi, mater veniae,
Proscriptos miseriae
Matris Evae filios,

6 b. Per peccatum venditos,
Ad gemendum genitos,
Poenae tributarios.

7 a. Audi reos, o benigna,
Dele thetam, thaii signa
Felici charactere,

7 b. Hoc sigillo Salomonis
Fac monetam Pharaonis
Nummos tuae dexterae.

8 a. Maris stella,
De procella

Nos ad portum protrahe.

8 b. Ex hoc mari fac levari,
Fac servari, fac locari
Nos in sinu Abrahae.