160. De beata Maria V.

1. Salve, virgo gloriosa,
Arbor vitae pretiosa
Ave, plena gratia.

2 a. Virga Iesse florem dedit
Et flos fructum, poena redit
In ludaeum, qui non credit
Peperisse virginem.

2 b. Eat rubor in Iudaeum,
Infernali morte reum,
Qui non credit esse Deum
Pariter et hominem.

3 a. Prodit partus, quem natura
Stupet contra carnis iura
Prodiisse sub figura
Et Dei et hominis.

3 b. Parit sine viri cura
Genitorem nata, pura
Virgo, cuius genitura
Lavit labem criminis.

4 a. Insuetum est audiri,

Quod sit mater expers viri,
De hac sola debet sciri,
Quod virgo pepererit.

4 b. O quam miser, quam deceptus
Infidelis et ineptus,
Ab errore interceptus,
Qui sic non crediderit.

5 a. Hunc debemus Deum scire,
Qui dignatus est vestire
Vestem servi, ne servire
Posset homo serviens.

5 b. Eva pomi morsum ausa
Principalis fuit causa,
Quare nobis fuit clausa
Porta vitam largiens.

6 a. Partus ventris virginalis,
Partus sanctus, immortalis,
Ex natura nullus talis
Conceptus in virgine.

6 b. Portam vitae reseravit
Et, quos Eva condemnavit
Fructu, luctu relaxavit
Ab aeterno crimine.

7 a. Ergo, virgo, mater Dei,
Fundamentum nostrae spei,
Quamvis simus omnes rei,
Te rogamus pariter,

7 b. Ut, cum iudex dicit ''Ite
Malis bonis et Venite,
''Perpetuae simus vitae
Participes iugiter.