161. De beata Maria V.

1 a. Stella solem pariens,
Stella casum nesciens,
Mater plena gratiae,

1b. Stellis stella celsior
Stellisque splendidior
Splendor est ecclesiae,

2 a. Stella, cuius radius
Obscurari nescius
In solis praesentia,

2 b. Quae tanto fit clarior,
Quanto soli propior,
Et fulget in gloria.

3 a. Stella, virgo virginum,

Sol est pater luminum

Virgine progrediens.

3 b. Hic est flos, quem praebuit
Virgula, quae floruit
De Iesse progrediens.

4 a. Huic mirabiliter
Flori porta iugiter
Obserata patuit;

4 b. Sic Dei iustitiam,

Sic et sapientiam

Operari decuit.

5 a. Sic rubus incenditur,
Sic vellus compluitur
Rore misso caelitus,

5 b. Sic est facta madida
Terra prius arida
Nutu sancti spiritus.

6 a. Sic illustrat radio
Sol vitrum, sed vitio
Vitrum caret penitus,

6 b. Sic venit in virginem,
Ut Deum et hominem
Uniret paraclitus.

7 a. Nos obtentu virginis
A reatu criminis

Christi mundet gratia,

7 b. Qui nobis det pectoris

Pacem atque temporis

Et aeterna praemia.