167. De beata Maria V.

1 a. Vale, virgo, vas pudoris,
Salve, mater creatoris,
Ave, doctrix et lux moris,
Gaude, lilium candoris,
Vale, mater Maria.

1 b. Vale, navis castitatis,
Remum gestans caritatis
Et in arca castitatis
Spem futurae libertatis
Praebes et solacia.

2 a. Ave, virgo dives Deo,
Vale, portus patens reo,
Salve, lux et gratia,

2 b. Gaude, mundi reparatrix.
Ave, caeli imperatrix,
Nostra pura gaudia.

3 a. Vale, vitae condimentum
Evae leniens lamentum,
Vetus per te testamentum
Ruit, surgit sacramentum
Re signans caelestia.

3 b. Vale, boni fundamentum,
Castitatis ornamentum,
Caritatis dans unguentum,
Suavitatis in augmentum
Temperans carnalia.

4 a. Vale, Deum gestans alis,
Ave, malas iungens malis
Et labellis labia,

4 b. Salve, Marthae functa cura,
Gaude, maesta circa plura
Exhibens obsequia.

5 a. Vale, salus, decus, vita,
Astris poli redimita,
Illuc tecum nos invita,
Ubi gaudes infinita
Pace et laetitia.

5 b. Ave, lapsi reparatrix,
Errabundi revocatrix,
Caeli, terrae mediatrix,
Utriusque solidatrix
Christo nos concilia.

6 a. Ave, dulcis Sunamitis,

Pulchra, casta, simplex, mitis,
Membra fovens regia,

6 b. Ave, fida poli scala,
Super astra tecum cala
In superna curia.

7 a. Ave, clara maris stella,
Quae, cum hostis movet bella,
Es asylum, arcus, cella,
Ne involvat nos procella
Per haec mundi maria.

7 b. Ave, nostri vis vigoris,
Finis longaevi doloris,
Salus es summi valoris,
Honor caeli, lux splendoris,
Tibi laus et gloria.