173. De Omnibus Sanctis.

1. Sancta Dei mater,

virgo benigna, Maria,

2 a. Tu nos miseros adiuva

atque Christi gratiam

nobis impetra,

2 b. Quae nos tua per merita

devitare faciat

cuncta noxia.

3 a. Beate Michael,

tu pro nobis

maiestatem

superni regis invoca,

3 b. Et cuncti caelibes

simul cives,

commendate

nos Deo prece sedula.

4 a. O Iohannes,

Christi baptista,

tu Deum pro nobis

iugiter ora.

4 b. Et tu, Petre

sancte, dignare

cuncta disrumpere

nostra vincula.

5 a. Omnes Domini

apostoli,

solvite

nostra delicta,

5 b. Quia vobis est

a Domino

potestas

ad hoc concessa.

6 a. Vos, Christi martyres,

qui vestra

tradidistis corpora

6 b. Pro Christi nomine

libenter

multa ad supplicia;

7 a. Vos quoque confessores

Christi et sacerdotes,

virginumque sanctarum

turma praeclara,

7 b. Precamini pro nobis,

ne nos extollat hostis

neque vana gloria

nec laus humana.

8 a. Omnes sancti Dei,

verba pro nobis ferte pia,

8 b. Rogate Dominum,

ut nostra deleat crimina

9 a. Et nos evadere

faciat

inimici scandala

et inferni claustra,

9 b. Nos quoque per suam

collocet

pietatem requie

saltem in aliqua,

10a. Ut libeat nos dicere:

honor, laus et gloria

10 b. Sancta tibi sit trinitas

per aeterna saecula.

11. Amen dicant simul cuncta,

amen, redempta.