175. De Omnibus Sanctis.

1 a. Cordis voto commendemus
Factoris praeconia,

1b. Nisu toto decantemus
Sanctorum sollemnia.

2 a. Quos vocavit et beavit
Dans finale bravium,

2 b. Quo fruuntur et conduntur
Intra caeli gaudium,

3 a. Quod beati, honorati

Nostris nunc in laudibus,

3 b. Consecuti sunt et tuti
A maligni fraudibus.

4 a. Ubi status intellectus,
Finis appetituum,

4 b. Ubi ratus est perfectus
Abest causa fletuum.

5 a. Iam Assuerus ille verus
Cenam dat principibus,
Angelorum beatorum
Debriatis potibus.

5 b. Iam devicto Philistaeo,
Ursu et leunculo,
Coronatur, palma datur
David regni solio.

6 a. O nunc, Christi confessores,
Arcanorum conscii,

6 b. Vestri nos imitatores
Et caelorum praemii

7 a. Procurate viva prece,
Ut post transitoria

7 b. Iubilemus una voce
In perenni gloria.