176. De Omnibus Sanctis.

1 a. Reboat angelica

Laude domus caelica,
Alleluia.

1 b. Laus est haec trifaria
Voce novenalia,
Alleluia.

2 a Per caelorum spatia
Resonant palatia,
Alleluia,

2 b. " Sanctus" ter clamantia
Pari consonantia,
Alleluia.

3 a. Vatum per praeconia
Dulcis est harmonia,
Alleluia.

3 b. In fide catholica
Laus est apostolica,
Alleluia.

4 a. Quam sequuntur fortia
Martyrum consortia,
Alleluia,

4 b. Quorum transitoria
Mors est, non victoria,
Alleluia.

5 a. Confessorum lilia
Concinunt similia,
Alleluia.

5 b. Virginum munditia
Carnis vincens vitia,
Alleluia,

6 a. Matrum continentia,
Pudor et prudentia,
Alleluia,

6 b. Laudum canunt neumata
Digna per celeumata,
Alleluia.

7 a. Ipsa lux aetherea
Cohorsque siderea,
Alleluia,

7 b. Solis, lunae lumina,
Aer, tellus, flumina,
Alleluia,

8 a. Temporum volumina,
Montium cacumina,
Alleluia,

8 b. Ventorumque flamina,

Frondes, herbae, gramina,
Alleluia,

9 a. Ex aquis reptilia,
Pisces, volatilia,
Alleluia,

9 b. Haec simul et alia
Deo dant magnalia
Alleluia.

10 a. Et nos in ecclesia
Melodum carthesia,
Alleluia,

10 b. Profundamus sapida
Mente de non vapida,
Alleluia.

11a. Dulcis laus Alleluia,
Sed laus ista aevia,
Alleluia.

11b. Eius, qui potentia
Manet in essentia,
Alleluia.

12 a. Eia et Eia,

Sonent Euterpeia,
Alleluia,

12 b. Voce licet varia
Vota fiant paria,
Alleluia.