178. De Omnibus Sanctis.

1 a. In hac die rex caelorum
In consilio iustorum
Congregat concilia;

1 b. Gaudent animae sanctorum,
Nam illius et illorum
Festa sunt communia.

2 a. Mater Dei gloriosa,
Super omnes speciosa,
Prima est in curia,

2 b. Quasi murra pretiosa,
Sicut balsamus et rosa,
Fragrans plus quam lilia.

3 a. Chori novem angelorum
Huius cantant ante thronum:
Ave, plena gratia.

3b. O quam canticum sonorum,
Terra resonat eorum
Voce cum melodia.

4 a. Verbi vates, agonista
Canens increpat baptista
Cantus paenitentia.

ib. Ille dulcis organista
Intonat evangelista
Verba verbi dulcia.

5 a. Sanctitas patriarcharum
Veritasque prophetarum
Legunt semiverbia.

5 b. Dulcis evangelistarum
Sonus resonat alarum,
Cantant evangelia.

6 a. Dignitas apostolorum
Supra vires aliorum
Volat ad sublimia.

6 b. Turba condiscipulorum,
Mensae regis sociorum,
Loquitur magnalia.

7 a. Martyres vivificati

"Facti sumus consolati"
Cantant cum laetitia;

7 b. Ubi corpus, congregati
Gloriantur imitati
Capitis vestigia.

8 a. Beatorum confessorum
Necnon et orthodoxorum
Sapiens facundia

8 b. Flores legit scriptuarum,
Sapor redolet earum
Medullarum pinguia.

9 a. Virgines tenentes chorum
Cantant canticum amorum,
Dulcis est symphonia.

9 b. Iubilo iuvencularum,
Sono tympanistriarum
Regis sonat regia.

10 a. Istis ergo supplicemus
Omniumque flagitemus
Omnes patrocinia,

10 b. Ut cum ipsis decantemus,
Regi nostro iubilemus:
Tibi laus et gloria.