180. De sancto Adalberto.

1. Annua recolamus

sancti Adalberti gaudia

2 a. Martyris, exsultant
unde caelorum lumina,

2 b. Hodie qui laxa

victor ascendit ianua

3 a. Et mundi votiva
suspendens,
quem crucifixit, spolia.

3 b. Nulla iam turbandus
procella
pace quievit placida.

4 a. Bohemia, filii
cunulas
osculando iubila,

4 b. Edentulo lactea
quae mater
immulsisti ubera.

5 a. Saxonia,

plaude discipuli gloria,
Quem tenera
stringens a puero ferula
Aaron induis infula.

5 b. Quid praesuli

Praga obstrepis indomita?
Si sequeris

huius praevii vestigia,
nulla foedaberis macula.

6 a. O fortis athleta,
post delicias
terens cilicio latera,

6 b. Pedester exemplum
in monachica
Romam intraveras regula.

7 a. Sed praedo sanctae invidens
obsequelae
fracta poculum
effundendo
laguncula
tua occubuit dextera.

7 b. Postremo multis precibus
evocatus
tuis ovibus
salutatis
in Prussia
carnis exueras vincula.

8 a. Polonia
ergo tanti
sepeliens
floret martyrii
pignora.

8 b. Otto Caesar
tua nisus
confidentia

Romanis retulerat brachii
munera.

9. Quem Deo

cum clero et plebe
commendare digneris
sibimet subiecta.