187. De sancto Agerico.

1 a. Congaudeat civitas,
Plaudat universitas
Virdunensis patriae;

1 b. Agerici gratia
Innovantur gaudia
Filiis ecclesiae.

2 a. Hunc, priusquam veniat
In mundum, praenuntiat
Angelus triennio.

2b. Praesulatus infulis
Decoratus populis
Praesidet praesidio.

3 a. Sol solito clarior
Et terris vicinior
Totus incanduerat,

3 b. Pulsis procul nubibus
Et suspensis imbribus
Sata terrae laeserat.

4 a. In conspectu omnium
In luctu degentium
Se sanctus humiliat,

ib. Sitientem precibus
Terram potat imbribus
Et aquis inebriat.

5 a. Ruit imber et procella,
Christus solus est pro cella
Et pro tecto praesuli;

5 b. Praesul in sereno situs
Fundit imbres, tenent litus
Aquas circa populi.

6 a. Homo vernat aridus,
Daemon fugit pavidus
Ipsius imperio ;

6 b. Clausa dudum lumina
Reparat in femina
Virtutis collirio:

7 a. Et praesulum praesuli
Revelantur loculi,

Quos declarant saecula;

7 b. Solo sancti poculo
Et crucis signaculo
Fecundantur vascula:

7 c. Vinum, quod defuerat,
Vincit et exsuperat
Childeberti pocula.

8 a. Si quis ista reprobat,
Exitus acta probat,
Mors aperta facie:

8 b. Sancti prodit meritum,
Cum emittit spiritum
In columbae specie.

8 c. Delectare landibus

Nostris, praesto precibus
Sis, pastor egregie.