188. De sancta Agnete.

1 a. Praesens coetus

Agneti decantet laetus
Alleluia,

1b. Quam signavit

Christi sanguis, et ornavit
Res miranda.

2 a. Agnes agnum sequitur,
In palam producitur
Sol de stella,

2 b. Sponsum Christum indicat
Et hunc voce praedicat
Semper clara.

3 a. Preces, minas, verbera
Contemnit et munera
Pari forma.

3 b. Caeditur exterius
Nec per hoc interius
Fit corrupta.

4 a. Nulla tam amabilis
Nec tam admirabilis
Valle nostra.

4 b. Ad lupanar trahitur,

Sed nunquam corrumpitur
Carne sumpta.

5 a. Crines crescunt, mittitur
Ipsi vestis ; moritur,
Cuius mens convincitur
Esse caeca.

5 b. Surgit, qui perierat,
Et ad fidem properat,
Populus considerat
Haec praedicta.

6 a. Igne non laeditur,
In quo proicitur,
Nec sic convertitur
Gens misera.

6 b. Ense perimitur,
Sic agno iungitur
Agnes, quem genuit
Puerpera.