189. De sancta Agnete.

1a. Exsurgat propere
Chorea virginum,
Festinet libere
Laudare Dominum
Regentem culmina;

1b. Prudentes, surgite
Sumentes munera
Sponsoque dicite:
Iam nobis resera
Conclavis limina.

2 a. Agnetis proelium

Necnon constantiam
Coetus fidelium
Laudet ad gloriam
Sexus feminei.

2 b. Virgo laudabilis

Tormenta pertulit,
Christo placabilis
Se totam obtulit,
Exemplar fidei.

3 a. Praefecti genitus
Agnetem diligit,
Quem virgo penitus
Et dona negligit
Licet insignia;

3 b. Assensum renuit
Dare monitibus,
Nec uti libuit
Coniungi nexibus
Spernens conubia.

4 a. Tunc ad prostibula
Nuda distrahitur,
Sed eius formula
Capillis tegitur,
Ut pudens lateat;

4 b. Et turpitudinis,

Qui erat squalidus,
Ingressu virginis
Locus fit nitidus,
Ut virtus pateat.

5 a. Sed auctor sceleris

Praesumens ingredi,
Relictis ceteris

Hanc temptans aggredi,
Repente cecidit:

5 b. Stupet Symphonius
Nato sic perdito,
Deus propitius
Agnetis merito

Mox prolem reddidit.

6 a. Extinctis ignibus
Percussa gladio
Iam cum caelestibus
Potitur bravio,

Quod mente petiit.

6 b. Precemur iugiter,

Ut cum bac virgine
Vivamus pariter
In Christo, nomine
Pro cuius obiit.