198. De sancto Antonino.

1. Celebranda

praeclari martyris
tropaea

2 a. Redimit hodie
anni orbita,
quem genus exornat
sanctaque vita.

2 b. Nobilis etenim
stirpe regia,
nobilior fide
propter opera,

3 a. Eruditus denique
lege sacra
doctores habuit
magnos in ecclesia.

3 b. Ordine, moribus,
vita, gratia,
quae non discreparent
a lege catholica.

4 a. A quibus, factus levita,
missus erogare semina

4 b. Multorum rigat arida
fluento perenni pectora.

5 a. Patrat miracula,
pellit daemonia,
fueat cuncta vitia.

5 b. Sic Romae propinqua,
sic et plura loca
visitat in Gallia.

6 a. Confessio pretiosa

sanctum Christi militem
vexit ad caelestia.

6 b. Nam pro fide catholica
caesus caput plectitur
in castro Appamia.

7 a. Cuius ut una

cruor stillavit in fluenta
gurgitis in fundo
adnexus lapidi,
non est lapsus cum aqua.

7 b. Hic, hic, natura,
hic amisisti tua iura,
liquidum liquido
nequis confundere,
sicut eras solita.

8 a. Famulatur subinde

sors angelica,
quae caput susceperunt

in navicula
et sub aquilarum forma
vati nobili

praebent sancta pignora.

8 b. O res mira, res nova,

res inaudita,
quae sibi contigisse

stupet natura,
retrograditur carina,
quamvis humana

desint adminicula.

9 a. Corpus in frusta
caeditur multa,
gurgitis spargitur
in fluenta,
sed nihil proficit
invidia.

9 b. Compage sua

nectuntur membra,
corpori redditur
forma sua,
siccum remanet
in arena.

10 a. Mirandis succedunt miranda,
quia cursum suspendit unda,
sceleris pro vindicta
tendit in Appamia,
diruit aedificia.

10 b. Stupens ergo tot miracula
ad se gentilis plebs reversa
vana spernit idola
et ad fidem conversa
baptismo lavit crimina.

11a. Sic operatur vis divina,
frumenti granum sorbet terra,
ex eo subcrescit seges multa,
quae cum summa laetitia
sancti martyris levat pignora.

11b. Levatur corpus ex arena,
levatur sanguis clausus petra,
Iohannes et Almachius una,
et sociat sepultura,
quos iunxerat fides et opera.

12 a. O Antonine inclite,
o martyr sancte,
o pastor et fortis athleta,
o doctor bone, tua
deposcimus suffragia,
tibi iunge nos
in caelesti curia.

12 b. Tibi sanctorum agmina
congratulantur
de tibi collata gloria,
caelestis aula summa
tripudiat laetitia,
et praesens tibi
supplicat ecclesia,

13. Cui locum impetra
in sempiterna gloria.