205. De sancto Augustino.

1a. Exsultet plebs catholica,
Cum regna scandit caelica
Augustinus.

1 b. Laetificat ecclesiam,
Caelestem ornat curiam
Augustinus.

2 a, Ab errorum laqueis
Liberatus,
Piae matris lacrimis
Est renatus
Augustinus.

2 b. Gaudium Ambrosii
Est impletum,
Cum se subdit fidei
Mansuetum
Augustinus.

3 a. Pestem fugat Arrianam,
Destruit Sabellianam
Augustinus.

3 b. Manichaeam pravitatem
Delet, docet veritatem
Augustinus.

4 a. Bellator fortissimus,
Miles invictissimus,
Hostes Christi detegit
Augustinus.

4 b. Clipeus muniminis,
Turris fortitudinis,
Cives suos protegit
Augustinus.

5 a. Imitatus primitivam
patrum formam
Reformare sacram studet
vitae normam
Augustinus.

5 b. Quod terrenis praeponenda
sint divina,
Tam exemplo monet fratres
quam doctrina
Augustinus.

6 a. Novo privilegio
Adhaesit Valerio
In sublimi culmine
Augustinus.

6 b. Faustus victus deficit,
Fortunatum deicit
Publico certamine
Augustinus.

7 a. Universam pellit

Pravorum perfidiam,
Haereses expellat,
Confirmat ecclesiam
Augustinus.

7 b. Corde diligenti

Sacris instat literis,
Novi testamenti

Scrutator et veteris,
Augustinus.

8 a. Mille voluminibus
Et librorum milibus
Distinctis codicibus

Fulget ut sol inter astra
Augustinus.

8 b. Signorum frequentia
Certa dat indicia,
Quanta fulget gloria
Super alta caeli castra
Augustinus.

9 a. Pater laudabilis,
Praesul mirabilis,
Nobis sit placabilis
Augustinus.

9 b. Suam familiam
Per Dei gratiam
Perducat ad patriam
Augustinus.