207. De sancta Barbara.

1 a. Ave, fulgens martyr Christi,
Aromatum exstitisti
Summi regis cella.

1 b. Barbara, dum credidisti,
Patris idola sprevisti,
Flagrans Dei stella.

2 a. Castus sponsus te dilexit
Teque sibi sic adnexit,
Ut sis eius socia.

2 b. Domum patris, quam fundasti,
Trina luce illustrasti
Trinitatis gratia.

3 a. Eia, mundum superasti,
Patris iram non curasti
Quaerentis te invenire.

3 b. Figuram tu trinitatis
Patri narras verbis ratis
In praesenti tempore.

4 a. Gaudet nunc turba caelica,
Arma sumit bellica
Virgo puerilis.

4b. Haec est patris confusio,
Deorum illusio,

Dum certat subtilis.

5 a. Induitur cilicio

Ad carnis detrimentum,
Conspuitur (in) supplicio,
Gratiae augmentum
Suscepit piissimum.

5 b. Rarissima haec nobilis
Rosa sine spina,
Castissima nec mobilis,
Ut de Engadina

Vinum est dulcissimum,

6 a. Luce divina

in caritate grata;
Insanus, profanus
Prece nolens carae gnatae

Mite in flagitio.

6 b. Maximiano

[crucianda] tradita,
Haec expoliata,
Discerpta, est praeparata

In Dei servitio.

7 a. Nudata, crine tecta,
Porta recta, lecta, vecta
Ad Uriel,

Quae fit fortiter Ariel
In luctu certaminis.

7 b. Omnibus gratiosa

Rosa, prosa, glosa ora
Et formosa,
Super multas virtuosa
Dono Dei flaminis.

8 a. Pastor mutatus

Tunc in saxum,
Oves fiunt locustae.
Haec fecit Deus

Clamans "Pax sum",
Qui honeste et iuste
Punit pro excessibus.

8 b. Quatiata,

Multa passa

Firmam tenebat mentem,
Confortata
Pacis massa,

Quae docet Dei gentem
Ire piis gressibus.

9 a. Regi regum copulata,
Postquam virgo copulata;
Cum patris iuvamine

9 b. Sacra pneumatis in unda
Filia suscepit munda
A malo spiramine.

10 a. Tu, virgo, debes Dominum
Reis conciliare
Atque manna caelicum

In fine procurare
Contra robur daemonis.

10 b. Uirgo, in mammis offensa
Deum semper colis
Et in flammis tu immensa

A zabulo doles,
Ebur Salomonis.

11a. Xristum,virgo, canis laetum,

Qui absterget omnem fletum,

Quaenon curas malum metum,

Nos perduc ad eum tecum,

Qui est super sidera.

11b. Yesse florem invenisti,
Ancorae spei adhaesisti,
Cosmi chaos respuisti,
Calanxiam didicisti,
Quae ducit ad aethera.

12. Zyma Babel aufer laete,
Ne nos prendat Dagon rete,
Qui praesumunt semper de te.
Senem, natum, flamen pete,
Ut festinet ad conductum
Nostrum auferensque luctum,
Ut det ferre pium fructum
Tecum laete post examen,
Fiat, fiat, Amen.