216. De ss. Cosma et Damiano.

1a. Rutilantis phoebi ortu
Dies sacra refulget,
In qua sancti martyres
Pro fide dimicantes
Tyrannorum diversa
Vicerunt supplicia.

1 b. Cosmas atque Damianus,
Incliti bellatores,
Parvipendentes omnia
Saeculi blandimenta,
Corpus dabant in mortem,
Adipiscerent ut vitam.

2 a. Laureati coronis
Aetherei splendoris
Modo laeti in caelis
Christum laudant cum angelis,
Qui talem semper suis
Dat coronam testibus.

2 b. Ad horum ossa inclita
Christi nitescit gratia
Aegris praestans varia
Morborum medicamina,
Caecis visum refundens,
Claudis gressum componens

3. Hinc iam pronis mentibus
Illis preces fundamus,
Ut dignentur nobis Christum
Facere propitium,
Quem amabant, cum quo regnant
Nunc et in perpetuum.