226. De sancta Euphemia.

1 a. Pace, virgo, sancta pasce
Nos, ut sacrosancti Paschae
Pascamur deliciis.

1 b. Compesce pestes, reatus,
Ut sit honor Deo gratus
Nostris de primitiis.

2 a. Piscis assi manducasti
Segma, quando degustasti
Passionis poculum.

2 b. Posce nobis posse stare,
Virtuosum purga clare
Nostrae mentis oculum.

3 a. Pusillanimes conforta,
Tua namque vita torta
Multis est suppliciis ;

3 b. Quae pro tuo sponso vere
Voluisti sustinere
Eiusque divitiis.

4a. Per capillos es suspensa,
Tibi luxit spes immensa
Domini de gratia,

4 b. Qui te fortem animabat
Et in bono confortabat
Tibi dans solacia.

5 a. Famelica virgo pia,
Satiaris, Euphemia,
Per angelos caelitus.

5 b. Post haec mitteris ad ursos,
Quorum te non tangit morsus
Nec angit anhelitus.

6 a. O beata virgo, grata
Deo, gladio necata,
Locum tui lateris

6 b. Qui transivit, ut sitivit
Tua vita, quae petivit
Caelum mox, sic pateris.

7 a. Priscus et Apellianus

Ruunt daemonis in manus,
Quos statim extinxerat.

7 b. Hinc puella tumulatur,
Iustis gratia donatur,
Quos amor astrinxerat.

8 a. Eia, virgo, nos tuere,
Confer, caelum ut sincere
Valeamus scandere.

8 b. Ora Deum, ut praedignum
Sui vultum et benignum
Nobis velit pandere.