231. De 8s. Ferreolo et Ferrutio.

1 a. Pangat chorus alternatim
clara modulamina,

1 b. Absit ut diaphonia,

concors sit melodia.

2 a. Odas solvat et decenter
nostra vox harmonica

2 b. Summo regi, qui beatos
doxa donat caelica.

3 a. Cui Ferreolus servivit
verus ut christicola

3 b. Et Ferrutius levita
parili constantia.

4 a. Veritatis quod fuere
testes sine macula,

4 b. Hos Aureliani iussit
puniri saevitia.

5 a. Actibus ut impleretur
iussio tyrannica,

5 b. Variis protraxit poenis
gens illos maniaca.

6 a. Ungulis sulcatae carni
affuit mastigia,

6 b. Hinc remoti distrahuntur
tirones ad troclea.

7 a. Malleis infixae cingunt
subulae post capita,

7 b. Tuncque magis disserebant
de fide catolica.

8 a. Mirum, quod non siluere
divina magnalia,

8 b. Lingua sunt evacuati

postquam sermonis sua.

9 a. Sibilat tyrannus stridens
dentibus ut vipera,

9 b. Incitat crudeli victus
colla caedi romphea.

10 a. Imperterritis athletis
poena datur ultima,

10 b. Flexo genu sursum corda
caelo dant spiramina.

11a. Gaudet polus angelorum,
sonant et tripudia,

11b. Compta gemmis hisque binis
exsultat Bisontia.

12. Horum precibus muniti
vivamus per saecula.