232. De sancto Florino.

1a. Florinus amabilis,
Sacerdos laudabilis
Sanctitatis gloria,

1 b. Fulget in caelestibus
Cum sanctorum coetibus
Peracta victoria.

2 a. Ibi summa trinitas,
Indivisa unitas
Consolatur omnia.

2 b. Huius praedicatio,
Huius operatio
Sit salutis nuntia,

2 c. Terrena despicere
Docens et acquirere
Paradisi gaudia.

3 a. Exstitit pro speculo,
Dum vixit in saeculo,
Huius Deo placita
Vita est intuita.

3 b. Fugans idolatriam
Emundavit patriam,
Ampla Rheni spatia
Perlustravit gratia.

4a. Nil terrenum ambiebat,
Quia vere diligebat
Iesum super omnia;

4 b. Apud ipsum obtinere
Velit, ut possimus fiere,
Quod mens timet conscia.

5 a. Claris signis decoratur
Locus, in quo veneratur
Operum per merita;

5 b. Daemonia fugat iste,

Haec concedis sibi, Christe,
Semper esse subdita.

6 a. Veneremur hunc patronum
Obtinentem caeli thronum,
Qui nobis beneficia
Largitur in laetitia.

6 b. Huius gaudet praesentia
Nobilis Continentia,
Qui ut rosa vel lilia
Redolet in ecclesia.

7 a. O Florine, florens rosa,
Te decet laus numerosa,
Tu nos Christo die isto
Clementer concilia.

7 b. Vir antiquae dignitatis,
Ora fontem pietatis,

Ut nos omnes a peccatis
Mundet data venia.