233. De Stigmatibus s. Francisci.

1 a. Corda pia inflammantur,
Dum Francisci celebrantur
Stigmata insignia.

1 b. Crucifixus hic secundus,
Crucifixus fuit mundus
Huic et mundi gloria.

2 a. Crucifixi primi Christi
Mors et vita fuit isti
Iugis meditatio,

2 b. Cuius cordis vim fervoris
Ostendit per membra foris
Stigmatum impressio.

3 a. Foris lucet, intus ardet,
Ut se cunctis exemplar det
Quaerendi caelestia.

3 b. Ordo monstrat haec Minorum,
Sanctae Clarae sic sororum
Et de paenitentia.

4 a. Crucifixe singulari

Modo, cruci conformari
Mente sic et habitu

4 b. Fac nos, ut in regno lucis
Perfruamur fructu crucis,
Quo laetaris frui tu.