235. De sancto Frontone.

1 a. Ad honorem salvatoris
Laudes vocibus canoris
Frontonis divisis choris
Praesens pangat curia.

1 b. Hic caelitus aspiratus,
Discipulis adgregatus
Baptismique Deo gratus
Suscipit mysteria.

2 a. Salve, Fronto, praesul Christi,
Cuius dilectus fuisti,
Constans fide recepisti
Optionis gratiam.

2 b. Salve, qui nos decorasti,
Quando munus impetrasti,
Ne degamus, exsulasti,
Unquam extra patriam.

3 a. Salve, cuius sumus curae,
Qui fuisti sepulturae
Marthae contra ius naturae
Raptus ad caelestia.

3 b. Imploramus, reverende
Pastor, precibus intende
Nostris et Iesum ostende
In superna gloria.