236. De sancto Gabriele.

1 a. Decantemus Gabrieli
Melos et pangamus ei

In hymnis harmonicis.

1b. Ipse astat creatori,
Deservit secretiori
Famulatu, ampliori,
Angelis prae ceteris.

2 a. Committitur Gabrieli
singulari titulo
Nuntiare incarnandum
filium ex virgine,

2 b. Quem natum denuntiavit
ingenti cum radio,
Cum angelis decantando
" Gloria in aethere".

3 a. Curam gerit nati verbi,
ut Herodem fugiat,
Ne ad ipsum revertantur,
magos reges admonet.

3 b. Reverenter consolatur
Iesum, cum agonizat,
Sudoremque detergendo
conversum in sanguinem.

4 a. Per hunc Christum surrexisse
Mariae innotuit,
Ut pergant in Gallilaeam
fratresque admonuit.

4 b. Iesum caelos ascendisse
Gallilaeos astruit,
Quem sic iudicem venturum
testatus asseruit.

5 a. Gabriel, tu praecursorem
Zachariae indicis
Gaudiumque universo
mundo lapso asseris.

5 b. Tu assistens maiestati
divinae in superis,
Supplica, expostulamus,
pro nostris angustiis.

6 a. Patronum te assumpsimus,
nobis quoque subveni,
Ne ab hoste devincamur,
fac, cura pervigili.

6 b. Ut, qui festa tuae laudis
devoti peragimus,
Conregnemus te ductore
in patria sublimi.