247. In Translatione s. Hildae.

1 a. Sponso regi castitatis
Nostrae chorus parvitatis
Gratae melos puritatis
Personet alacriter.

1b. Nam hac caeli luce festa
Venerantur Hildae gesta,
Qua translata carnis testa
Eius est sollemniter.

2 a. Haec Edwini regis neptis
A primaevae vitae coeptis
Iugis Christi in praeceptis
Meditari studuit.

2 b. A Paulino baptizata
Sacramentis et ornata,
Fide sana, verbo grata,
Satis late claruit.

3 a. Spreto luxu saeculari
Haec sub veste regulari
Veri sponsi subarrhari
Annulo promeruit.

3 b. Haec aetate profluente
Puber annis, cana mente,
Ire Christo suggerente
Galliam disposuit.

4 a. Hinc pro voto transfretator
Et, quae diu suspiratur,
Hereswida visitatur
Calae monasterio.

4 b. Quo per annum commoratur
Et, ut plene doctrinatur,
Aiclani revocatur
Praesulis imperio.

5 a. Revocata consorores,
Quas ascivit iuniores,
Disciplinae docet mores
Prope Wyri fluvium.

5 b. Et post annum hinc recessit
Ad Herutheu processit,
Ubi abatissae gessit
Graviter officium.